# அன்பளிப்பு #

மாங்குளத்து கிளிக்கண்ணி
மேக்காட்டு கீரிப்பிள்ள எனக்கு
வாக்கப்பட்டு வந்த போது
போட்டிருந்த தோட்டோட - ரெண்டு
பொட்ட ஆடும் கொண்டாந்தா,

கட்டி வந்த இவ எனக்கு
ஒத்த குட்டி பெத்து தரு முன்னால
அவ ஓட்டி வந்த _ அந்த
ரெண்டு பொட்ட ஆடும் மொத்தம்
எட்டு குட்டி போட்டிருச்சி

பொண்ணு பொறந்துட்டா இனி
பொழப்ப பாரு ன்னா
கீத்து மறப்பெடுத்து
சிமென்டு சுவர் வச்சி
அட்டையாவது போட்டு ஒரு
வீடு கட்டி குடுன்னா

அதுக்குள்ள இந்த
பத்தாடும் பத்தாச்சி
எண்ணிப்பாத்தப்ப
இருபதுன்னு தெரிஞ்சாச்சி.
கீரிப்பிள்ளைக்கு இப்பத்தான்
இன்னமும் சிரிப்பாச்சி .

பத்தாட்ட பிரிச்சி வச்சி
ஓலைச்சுவர பிரிச்சி போட்டேன்.
சந்தைக்கு ஓட்டிப் போனேன்.
சிமெண்டும் செங்கலுமா
மாத்திட்டு வந்து சேந்தேன்.
மணல் நாளைக்கு
வந்து சேந்துருமாம்.

விடியுமுன்னால என் வீட்டுக்கு
பஞ்சாயத்து கிளார்க்கு வந்து
வீட்டுக்கு அப்ரூவல் வாங்கச்சொன்னான்.
அப்ரூவல் னா என்னன்னேன்?
அனுமதி ன்னு அர்த்தம் சொன்னான்.
அஸ்திவாரமே இல்லாத வீட்டுக்கு
அனுமதி தர ஒரு ஆடும்
அன்பளிப்பா ரெண்டு ஆடும்
அப்பவே ஓட்டிட்டு போனான்.

முக்கா வீட்டுக்கு மேல
மூடாக்கு அட்ட போட
மூணாடு செலவாச்சி
கொத்தனாரும் சித்தாளும்
சோடியா ஆனதுல
அவங்க கூலிக்கு
மிச்சமிருந்ததுல ரெண்டாடு
மிச்சமில்லாம போயிருச்சி .

மிச்சமிருக்குது ரெண்டாடு.
கரண்டு வாங்கி கொண்டாடு.
கரண்டு வாங்குமுன்னால
ஒத்த ஆடு கரண்டு படிச்சி
செத்துபோச்சு.
பிரியாணிக்கு ஆகுமுன்னு
தூக்கிட்டு போனப்புறம் தான்
தெரிஞ்சது.
கரண்டும் அவங்க கரண்டு தான்னு.

லைட்டு எரியறன்னிக்கு
லைன் மேனு வந்தாரு.
ஒத்த ஆட்ட வித்து குடு
சுண்ணாம்புக்கு வெத்தல போல
ஊறுகாக்கு சாராயம் வாங்கி குடுன்னாரு.
மொத்த ஆடும் இப்ப
முழுசா செத்து போச்சு.

அன்பளிப்பு வாங்குன
அரசாங்க ஆபீசரு மாரே.
பொழப்புக்கு வழியில்ல.
ஒங்கூட்டுல பொண்ணுருந்தா
ஒண்ணு எனக்கு கட்டி குடு.
நெறஞ்ச வயிரோட
ரெண்டு வெள்ளாடும் குடுத்து விடு.

கவிதாயினி எழில்விழி.