# அரணா கொடியும் அரை மூடியும் #

கருகமணி கட்டிவிட்டு - அது
உரசும் இடம் பற்றி
காமம் பேச தெரிந்த நீ
கண்களில் மட்டும் காதல் காட்டுகிறாய்.
உனக்கு தேவை காதலா? காமமா?
எனக்கா? இரண்டும்தான் வேண்டும்.

பாசிமணி வாங்கிதந்து _ அதில்பாதி நானென்று சொன்னாலும் சொன்னாய்,
போடுவதா? வேண்டாமா?
வெட்கத்தில் நான்,
உரச மாட்டேன் என்று சொல்லேன்.
உரிமையோடு போட்டுக்கறேன்.

"இந்தாடி மஞ்சத் துண்டு - பூசிக்குளி "
"மஞ்சளுக்குள் நானிருக்கேன் "
கொடுத்து செல்கிறாய்.
பூசுனத காட்டுடின்னு
விடியலுக்கு முன்ன பாக்க வருவே
வர மாட்டேன்னு சொல்லி விடு - நான்
உடல் முழுக்க பூசிக்கறேன்.

கங்கணம் கட்டிக்கொண்டு ' நீ -
வாங்கிதந்த பட்டியலில்
சின்ன மணிபர்ஸ் தொடங்கி
உள்ளாடை வரை அடக்கம்.
அட. அடங்காதவனே,
அறைக்குள்ள அதுகளோடதான்
அன்னாடம் வாழ்ந்துக்கறேன்.

அடேய் சரவணா .......
இதுவரைக்கும் நீ தந்ததெல்லாம்
காலப்போக்கில் உருமாறி உருமாறி
காதலுக்கும் காமத்துக்கும் எனக்கு
அர்த்தம் சொல்லி,
காணாமலும் போயிருச்சி .

இருவது வயசுல நீ குடுத்த
இடுப்பு ஒட்டியாணம் மட்டும்.
காலப்போக்கில் உருமாறி
இடுப்புக்கொடியாகி என்னோடு
நம்ம காதல் பேசுது
ஒம்மவளுக்கு அரை மூடியாகி
நம்ம காமம் பேசுது.

கவிதாயினி எழில்விழி.