# வலி #

அடேய் சரவணா .......

வார்த்தைகளுக்குள் அடங்க
மறுக்கும் என் அழகான திமிரே!
அந்தியிலே வருவாயா?
அய்யனார் கோவிலுக்கு,
என்னது?
முந்தி விரிக்கணுமா?
ஏன்?
சந்தி சிரிச்சாத்தான்
தாலி கட்டுவீகளோ?

வார்த்தைகளுக்குள் அடங்க
மறுக்கும் என் வசீகர திமிரே!
ஒற்றை உள்ளாடையுடன்
ஆற்றில் குளிப்பது உன் உரிமை.
அதை தடுப்பது என் கடமை.
அட, அசிங்கம் புடிச்சவனே.
என் ஒண்ணு விட்ட தங்கச்சியும்
ஒன்னையே பாக்குறாடா....

வார்த்தைகளுக்குள் அடங்க
மறுக்கும் என் வாலிப திமிரே!
நிச்சயம் தான் முடிஞ்சதேன்னு
மச்சு வூட்டுக்காரி மயக்கி போட்டானா
அவள கடிச்சி துப்பிருவேன்
கால் காசுக்கும் ஆகாம - ஒன்ன
கண்ட துண்டமாக்கிருவேன்.

வார்த்தைகளுக்குள் அடங்க மறுக்கும்
என் மாப்பிள்ளை திமிரே!
இறுக்கிப் பிடிக்காதே இப்போது .
இது பகல் தானே
கை மட்டுமே வலிக்கும்.
இதே இறுக்கத்தை இரவில் காட்டு.
இருப்பவை எல்லாம்
இனிப்புடன் வலிக்கும்.

வார்த்தைகளுக்குள் அடங்க
மறுக்கும் என் வாழ்நாள் திமிரே!
இதுவரை உன்னால்
உண்டாக்கப்பட்டவை
விடிந்ததும் மறைகின்ற
விசித்திர வலிகள்.
இப்போது உண்டானதோ - நல்ல
சித்திரத்தின் வலிகள்.
புரியவில்லையா?
அடேயப்பா சரவணா
இது பிரசவ வலிடா......

# நீ அப்பாடா #

கவிதாயினி எழில்விழி.