# அவனதிகாரம். #

என்னால் வெகு நேரம்
மெளனமாய்
இருக்க முடியாது.
உடனே வா .
உன்னைத் தவிர
எல்லோராலும்
எப்போதுமே
தவறாகவே
மொழிபெயர்க்கப்படுகிறது,
என் மெளனம்.

வெகு நேரம் நான்
கோபத்தில்
இருக்கிறேன்
உடனே வா.
என் கோபம்
வரும் வழி
எல்லோருக்கும்
தெரிகிறது.
தீர்க்கும் வழி
உன் உதடுகளுக்கு மட்டுமே
தெரிந்திருக்கிறது.

எனக்கு தூக்கம்
வருகிறது.
உடனே வா .
நான்
நேராக படுத்தால்
மெத்தையாகவும்
குறுக்காக படுத்தால்
தலையணையாகவும்
மாறும் வித்தை
உனக்கு மட்டுமே
சாத்தியம்.

ஆடை விலகிய
என் உடலில்
அங்கங்கே
கொசு கடிக்கிறது
உடனே வா,
மழிக்காத உன்
முகத்தால்தான்
சொறிந்து
கொள்ள வேண்டும்.

மறந்தே விட்டது.
இன்று முதல் நாள்
வயிற்று வலியுடன்
குளியலறை
போகிறேன்.
உடனே வா .
நேற்று பார்த்த போது
தீர்ந்திருந்ததது.
வேண்டாம்,
நீ வர வேண்டாம்.
இருக்கிறது.
எனக்கு தெரியாமல்
எப்போது
வாங்கி வைத்தாய் ?

பத்து மணிக்கு மேல்
உதிரும் பூக்களை
ஒரு நாளாவது என்னை
சேகரிக்க விடு.
மொத்த பூக்களையும்
என் காலடியில் இருந்தே
தினமும் எடுத்து
சலித்துப் போய்விட்டது
எனக்கு.
எப்போது எழுந்து
சேகரிக்கிறாய்?

அட சிவனே.
அவனை
யாரிடமும்
கொடுத்து விடாதே.
அவனோடு
வாழ்வது
இன்னமும்
சலிக்கவில்லை
எனக்கு.

கவிதாயினி எழில்விழி.